I nodi - E cantare

Ogettivi :
Esse capace d’urganizà l’infurmazione nentru à u tavulellu à doppia entrata.
Esse capace à cudificà è scudificà.

Materiale :
Una quatrittera maiò di 6 cantare nantu à 6.
Una quatrittera maiò cù sciffri da 1 à 6 nantu à e righe à fallera è cù e lettere da A à F nantu à e righe à passera.
Una quatrittera maiò cù i sciffri da 1 à 6 nantu à e cantare à fallera è cù e lettere da A à F nantu à e cantare à passera.
Listesse quatrittera in A4 da distribuisce à i zitelli.
Tichette cù elementi di u racontu (una seria di 6 cappuccini, una seria di 6 culori, una seria di 6 sporte, una seria di sciffri chì currispondenu à a quantità di vasetti nentru à a sporta...)

Sbucinera :
prima tappa :
Travagliu cullettivu
U maestru prupone e tichette di i cappuccini è e tichette di i culori è dumanda à i zitelli di truvà tutte e suluzione per culurisce i cappuccini.
Dopu, li prupone e tichette di e sciarpe è face listessa dumanda.
U maestru chere tandu s’ellu ci hè un mezu di prisentà e suluzione di modu subitu capiscitoghju. Lascia riflette i zitelli è s’ell’ùn hà micca risposte prupone ellu una quatrittera.

I zitelli venenu à disignà in a cantara chì cunvene. Per indettu :
 u pantalone neru
 a sciarpa verde
 u cappuccinu turchinu
 u pantalone aranciu
 a sciarpa rossa
 u cappuccinu giallu...

Seconda tappa :
Travagliu cullettivu
U maestru appicca à u tavulone a quatrittera cù e lettere è i sciffri nantu à e linee. Si tratta tandu di i nodi.
Prupone à i zitelli di pruvà à piazzà e tichette cù i cappuccini ind’ellu cunvene.
« Chì pò vene à u tavulone à piazzà u cappuccinu rossu nantu à u nodu (B ; 3) ? »
Lascia riflette i zitelli. Ricummencia parechje volte cù l’altre tichette.
Face rimarcà chì per sapè induve piazzà a tichetta ci vole à cunnosce dui elementi vale à dì a lattera è u sciffru. U nodu si trova à a crucivia di e duie linee mintuvate. Si dice tandu chì u codice chì currisponde à un nodu hè datu da a lettera è u sciffru di e linee. Si scrive u codice trà parentesi : ( B ; 3)
In u secondu tempu, u maestru piazza ellu una tichetta nantu à un nodu è face cudificà u nodu. Ripiglia parechje volte.

Terza tappa : travagliu cullettivu
U maestru pruduce cum’è in a seconda tappa cù a quatrittera chì insegna e cantare. Insiste nantu à e regule di cudifica è di scudifica.

Fiscia per u sculare : travagliu individuale

U tavulellu à doppia entrata

U tavulellu à doppia entrata