Ogettivi :
 Identificà e famiglie di l’alimenti è u rollu di l’alimenti ind’è l’urganisimu.
 Amparà e regule di l’equilibriu alimentare.

Materiale :
 Copie di u fogliu chì vene dopu à a lezziò.
 Gumette rosse, bianche, verde, castagnine, arance è gialle.
 Alimenti di plasticu o ritatti d’alimenti o l’affissu scannerizatu.

Sbucinera :

Prima tappa :
Identificà i gruppi di l’alimenti
U maestru prisenta l’affissu o una seria d’alimenti (ritratti frastagliati, alimenti di plasticu...).
Face circà di modu cullettivu cumu classificà l’alimenti (animale o vegetale...).
Si ghjunghje à a classifica :
 Primu gruppu : carne, pesci, ove.
 Secondu gruppu : latte è prudutti lataghji.
 Terzu gruppu : legumi è frutti.
 Quartu gruppu : biade, farinosi.
 Quintu gruppu : prudutti inzuccherati.
 Sestu gruppu : i grassi.

U maestru distribbuisce u tavulellu (quellu di u fogliu chì accumpagna sta lezziò). Face leghje u nome di e famiglie di modu cullettivu. Si adopra un codice di culore cù e gumette
 primu gruppu rossu cum’è a carne
 Secondu gruppu : biancu cum’è u latte.
 Terzu gruppu : verde cum’è a fronda.
 Quartu gruppu : castagninu cum’è e lentichje o u pane.
 Quintu gruppu : aranciu cum’è a cunfittura.
 Sestu gruppu : giallu cum’è u butiru).
U maestru prupone un eserciziu di mimurizazione.

Seconda tappa :
Identificà u rollu di l’alimenti ind’è l’urganisimu.
U maestru spica chì per ingrandà u corpu umanu hà bisognu d’elementi di custruzzione da fabricà l’osse è i denti (nentru à u latte è i prudutti lattaghji), i musculi è a pelle (i protidi nentru à a carne è i pesci).
U maestru dice dopu chì i musculi sò cum’è un mutore chì hà bisognu d’essenza (energia). Spieca chì ci hè trè spezie di « essenze » aduprate : i zuccheri attempati per u sforzu longu (nentru à e biade è i farinosi) ; i zuccheri spicci per u sforzu cortu (nentru à i frutti, i legumi, i prudutti inzuccherati) ; i grassi chì sò una riserva d’energia. U maestru aghjusta chì u corpu umanu hà dinù bisognu di vitamine è d’acqua per finziunà bè.

Terza tappa :
 Dà e regule di l’equilibriu alimentare.
Dumanda u maestru : « Quantu volte manghjemu ogni ghjornu ? ».
Lascia risponde i zitelli. Dice chì 4 ripasti à ghjornu sò necessarii. Face dì u nome di sti ripasti (Sdighjunu, cullazione, vesperinu, cena).
U maestru ripiglia u tavulellu è face rimarcà ch’ùn ci hè alcunu alimentu chì currispondi à tutti i bisogni di u corpu umanu. A regula hè di manghjà un alimentu d’ogni gruppu tutti i ghjorni. Si deve manghjà un elementu d’ogni culore (fora di l’aranciu è di u giallu chì sò digià ind’è l’altre famiglie d’alimenti).
U maestru face vene un zitellu à u tavulone da stabbilisce ripasti cù l’aiutu di u codice di culore. Dumanda à un zitellu di prupone un ripastu micca equilibratu. Tocca tandu à un antru zitellu à reequilibrallu mudifichendu, aghjustendu o cacciendu alimenti.
Per compie, u maestru intruduce un cuntrastu nantu à u tema « Si sà avà ch’ellu ci vole à manghjà di tuttu, ma ùn lu femu micca sempre. Perchè ? ».
Si sprimenu i zitelli è sorge l’idea chì spessu ùn si vole micca manghjà l’alimenti scunnisciuti. (hè dunque impurtante di prupone attività per sviluppà u gustu è l’odoratu).