Poesie scelte natu à u tema di Cappuccinella Rossa

Capu cappuccinu
Capu cappuccinu
Di lana è di linu
Capu cappucciò
O cappuccinò
Ghjuvanteramu Rocchi

---

O bà ghjunghji avà
Chì u sole chì u sole
O bà ghjunghji avà
Chì u sole si ne và
Sine và pè a marina
À vedeci à dumatina
O bà ghjunghji avà
Chì u sole chì u sole
O bà ghjunghji avà
Chì u sole si ne và !

Ghjuvanteramu Rocchi

---

I passi persi

Passi di a mamma
Chì passa è chì vene.
Passi di u babbu
Chì parte è chì ghjunghje.
Passi di i ciucci,
Passucci.
Passi di i innamurati.
Passi asgiati,
Di mammona è di babbone,
Passi in giru à u fucone.
State state à sente
U silenziu pisiu di i passi persi
Chì passa !

Ghjuvanteramu Rocchi

---

Acquafiatu

Hè l’attrechju
Un vecchju,
Riloghju senza sfiere,
Aghjumpatu si stà
À guardà e custere
È u sole quallà
Rossu rossu chì langue
Prima di travuccà
Pare un caghju di sangue.

Ghjuvanteramu Rocchi

---

Basgi

Pendini rossi
Suchjosi basgi
Di sole appesi à i chjarasgi !
Pichjate, pichjate o zitelli
A spartevili cù l’acelli.
Pendini rossi
Suchjosi basgi
Di sole appesi à i chjarasgi.

Ghjuvanteramu Rocchi

---

Eiu, sò paulu
Tù sei mamma
Eddu hè babbu
È avà dì la tù
La toia a famiglia.

Paulu Zarzelli

---

Aghju un capu caponi
Cù un paghju d’arichjoni
Dui ochji, un nasoni
Bucceddi è baviddoni.

Paulu Zarzelli

---

Fronti di sapienti
Ochji turchini (castagnini o neri )
Nasu di volpe
Bocca basgina
Baveddu trimendu
È ghisù, ghisù, ghisù...

Paulu Zarzelli

---

Mì, comu eddu salta, Lavisu !
Mì, comu eddu corri, Lavisu !
Mì, comu eddu si lampa, Lavisu !
Mì, chì si hè sciappatu u nasu, lavisu !

Paulu Zarzelli

---

A mani quandu mi pesu
Mi lavu a faccia
Mi puliscu i denti
Mi pittingu i capelli
È zzù ! À ghucà !

Paulu Zarzelli

---

Chjara Stella, Stella Chjara
A me puppunuccia cara
Voli andà à spassighjà
A ghjucà è à cantà ?
Metti allora u cappuccinu
Micca u rossu ma u turchinu
Metti dinò i to guanti
Micca i neri ma i bianchi
È di u to mantellu ùn ti scurdà !
Chì fora u ventu t’hà da cutrà !

Maria Antonia Salini

---

Eranu dui
Eranu trè
Chì si n’andavanu à caccia
Eranu dui
Eranu trè
Chì s’eranu messi intraccia
Eranu dui
Eranu trè
Appressu à una vulpaccia
Quella nè dui nè trè
Ùn fece di la minaccia
I si lentò tutt’è trè
Fenduli la doppia faccia
Fù cusì chì i cacciadori
Vultonu viota bisaccia.

Ghjacumu Fusina

Puesie

Puesie