Cappuccinella Rossa - Charles Perrault

Adattazione di F.M Perfettini « Un mazzulu di fole »

In tempi d’una volta, ind’una casuccia à l’orlu di a furesta, ci stava una donna cù a so figliola. A zitella si chjamava Cappuccinella Rossa perchè chì a Mamma l’avia fattu un cappuccinu di lana rossa è a zitella , truvendu ch’ellu li stava propiu bè, u purtava sempre. Cusì li ne era firmatu u nome.
Al dilà di a furesta campava a Mammone di Cappuccinella Rossa.
Eccuci chì un bel ghjornu a Mamma disse à Cappuccinella Rossa :
 Aghju intesu dì chì Mammatone hè malata ; Ci vole chì tù li porti sta micchittuccia è stu vasettu di butiru. A cunnosci a strada ? Iè ? Allora fila a to strada diritta è sè tù trovi à qualchissia, ùn piantà ! Soprattuttu s’ellu hè u lupu ! Ai capitu ?
 Iè, o Mà, ùn ci hè bisognu à dilla tantu... Filà a mo strada... Ùn parlà cù nisunu... Ùn perde tempu...A vedi chì a sò !

A zitelletta partì allegra cù u so spurtellucciu è filò a so strada per andà ind’è a Mammone. Ghjustu s’ella piantava à coglie qualchì fiore per fà un mazzulu per a so Mammone. D’un colpu, Cappuccinella Rossa sentì un rimore. Si girò è chì ti vide ? Un lupu, ma un lupu tamantu chì ùn si pò dì. Un lupone !
 Salute o Cappuccinè, disse u lupu cù a so vucione. U lupu, si capisce, cunniscia à Cappuccinella Rossa postu ch’ellu l’avia fidighjata à spessu cù i so cannuchjali pensendu « una zitelletta cusì paccicciotta deve esse un pranzu di principe ! »
A sapia Cappuccinella Rossa ch’ella ùn devia parlà cù nisunu ma, cunniscendu u calateu, rispose :
 Salute o sgiò Lupu, salute !
 Sì Cappuccinella Rossa è ci scumettu chì tù vai ind’è Mammatone ... A cunnosci a strada ? Aspetta, t’aghju da fà vede un scurtatoghju.
 Innò o sgiò Lupu ! U pruverbiu dice chì « strada bella ùn fù mai longa »...
Cappuccinella Rossa ripigliò a so strada è u lupu a lasciò andà dicendu : « Ti scumettu ch’aghju da fà più in furia chè tè ! ».
U lupu si misse à corre cù un surrisu ingordu nant’à e labre. Ben intesu, ghjunse u primu ind’è a Mammone , bellu nanzu à Cappuccinella Rossa . Ghjuntu davanti à a casarella, pichjò à l’usciu.
 Quale hè ? dumandò a vechja cù a so vuciarella.
 Sò eiu, a vostra figliulina, a vostra Cappuccinella Rossa, o Mammò ! rispose u lupu pruvendu à cambià a so voce.
A vechja, cuntenta di vede a figliulina, disse :
 Tira a funicella, a vulella cascherà è a porta s’aprerà ! Sentendu ste parolle, u lupu s’infrugnò in casa, si fragò à a vechja è a si ingullì sana sana senza mancu mastucalla.
U lupu si liccò u mustacciu pensendu chì a vechja era ghjustu un apperitivu è chì prestu avia da affaccà un pranzu più tenneru... In furia, si sciaccò a scufia di a Mammone, si vestì cù una di e so camisge di notte, si ficcò in lettu è aspittò.
Ùn aspittò tantu chì Cappuccinella Rossa s’era spicciata è ghjunse anc’ella à pichjà à l’usciu.
 Quale hè ? disse furdanone di u lupu pruvendu à parlà cum’è una vechja.
 Sò eiu, a vostra Cappuccinella Rossa, rispose a zitella.
 Tira a funicella, a vulella cascherà è a porta s’aprerà ! recitò u lupu chì avia tenutu à mente e parolle di a Mammone.
Cappuccinella Rossa entrò subitu è s’avvicinò à u lettu.
 O Mammò, tamanti ochji chì vo avete !
 Sò per vedeti megliu, a mo figliuluccia !
 O Mammò, tamante arechje chì vo avete !
 Sò per senteti megliu, a mo figliulella !
 O Mammò, chì bracce tamante !
 Sò per megliu abracciatti a mo figliulella !
 O Mammò, chì dentoni !
 Sò per manghjatti megliu, o niscentrò ! Cù ste parolle, u lupu si tirò à Cappuccinella Rossa è a si ingullì sana sana.
« Aiutu, aiutu ! » striddavanu duie vuciarelle da nentru à a panza di u lupu.
Ancu di grazia chì fora c’era un cacciadore, ch’ellu avia vistu è intesu tuttu ! Entrò subitu cù u so fucile è sciaccò una cartucciata à u lupu. Si sentianu sempre i lagni di a Mammone è di Cappuccinella Rossa, allora u cacciadore cacciò a so cultella di stacca è aprì u corpu di u lupu. Escinu inseme a vechja è a zitella.
 A ringrazziavvi o sgiò Cacciadore, disse a Mammone, è femuci un vesperinu cù sta micchetta è stu butiru.

Racontu pè u ciculu 3

Racontu pè u ciculu 3