Cappuccinella Rossa hè una zitella chì stà in una casuccia in furesta cù a so mamma. Si chjama Cappuccinella Rossa perchè porta sempre in capu un cappuccinu di lana rossa. Un ghjornu, a so Mamma li dice :
" A mo figliulella, vai à vede à Mammone chì hè malata è portali stu biscottu cù stu vasttue di butiru. Attenti chì in furesta ci hè u lupu ! Ùn ti piantà ! Fila a to strada !"

Cappuccinella Rossa parte allegro cù u so spurtellu è passendu per a furesta si coglie ghjustu qualchì fiore pè a so Mammone.

D’un colpu, s’affaca un lupu, un lupu tamantu !... S’avvicina à a zitella è li dice cù a so vucione :
-Salute, o Cappuccinè ! Induve vai ?
-Vò ind’è Mammò da l’altra parte di a furesta à purtalli un biscottu è un vasettu di butiru.
-S’è tù voli ti facciu vede a strada.
-Innò o sgiò lupu, ti ringraziu ! A cunnoscu a strada è ùn aghju micca dirittu di piantà à parlà cun tè ! Avvedeci."

Cappucinella Rossa ripiglia a so strada chì sà ch’ellu hè un animale periculosu u lupu.
Ma ellu, chì hè gattivu, parte à corri corri è ghjunghje in casa di a Mammone nanzu à a zitella. Pichja à a porta.
" Quale hè ? dumanda a Mammone da u lettu.
-Sò eiu, Cappuccinella Rossa, a to figliulina ! risponde u lupu cù una vuciarella debbule.
-Tira a funicella, a vulella cascherà è a porta s’aprerà ! "

Tandu, u lupu apre a porta, s’infrugna in casa, si lampa nant’à a vechja è a si manghja sana sana !
Si lecca u mustacciu u lupu è li vene un’idea... si mette in capu a scufia di a Mammon epo si veste cù a so camisgia di notte è si ficca in lettu.

Pocu tempu dopu, ghjunghje Cappuccinella Rossa è pichja à a porta.
« Quale hè ? dumanda u lupu da u lettu cù una vocce di veghja.
-Sò eui, Cappuccinella Rossa, a to figliulina ! risponde a zitella.
-Tira a funicella, a vulella cascherà è a porta s’aprerà ! »

Entre, s’avvicina à u lettu per andà à basgià a so Mammone ma si pianta, stunata...
« O Mammò, tamant’ochji chì vo avete !
-Hè per vedeti megliu a mo figliulella !
-O Mammò, tamant’arechje chì vo avete !
-Hè per senteti megliu a mo figliulella !
-O Mammò, tamante brace chì vo avete !
-Hè per abbracciatti megliu a mo figliulella !
-O Mammò, tamanti denti chì vo avete !
-Hè per manghjatti megliu a mo figliulella ! »
Tandu u lupu si lampa nant’à Cappuccinella Rossa è a si manghja sana sana.

Un cacciadore chì passa vicinu à a casa sente i mughji chì venenu da u corpu di u l’animale :
« Aiutu, aiutu, aiutu !!! »
Entre in casa è cù u so fucile, tira nant’à u lupu chì casca mortu po li apre u corpu cù a so cultella. Sortenu Cappuccinella Rossa è a so Mammone.
Sò cusì felice chì invitanu u cacciadore à fà u vesperinu cù u biscottu è u vasettu di butire.

Racontu pè u ciculu 1

Racontu pè u ciculu 1