Ciculu 3 (CE2)
U passatu cumpostu Ogettivu :
 Cunnosce u funziunamentu di a lingua
 Sapè custruisce u passatu cumpostu di i verbii in « à » ( custruzzione cù l’ ausiliariu « avè »)

Sbucinera :

Prima tappa : Travagliu à bocca
U maestru ripiglia u filu di u racontu. Ripiglia l’azzione aduprendu u passatu cumpostu ind’è e so dumande :
 Ch’anu fattu i funghi in a chjarina ?
→ I funghi anu urganizatu una riunione in a chjarina.
 Ch’anu prupostu e ghjire ?
→ E ghjire anu prupostu d’andà à truvà a signora di a furesta.
 Ch’hà fattu a signora di a furesta ?
→ A signora di a furesta hà dumandatu à Taviu di risparà i funghi.
 Ch’hà fattu tandu Taviu ?
→ Taviu hà cuntinuatu à coglie i funghi.
 Chì li hè accadutu à Taviu
→ Taviu hà manghjatu una frittata tamanta è hà avutu a pena in corpu.
 À quale Taviu hà chjamatu à u succorsu ?
→ Taviu hà chjamatu à u succorsu a Signora di a furesta.
 Ch’hà fattu a Signora di a furesta ?
→ A Signora di a furesta hà fattu prumette à Taviu d’ùn stirpà più i funghi è hà priparatu una tisana per guariscelu.

Seconda tappa : A regula di custruzzione di u passatu cumpostu
U maestru hà scrittu à u tavulone e frase :
A signora di a furesta hà dumandatu à Taviu di risparà i funghi.
Taviu hà cuntinuatu à coglie i funghi.
Taviu hà manghjatu una frittata tamanta .
A signora di a furesta hà priparatu una tisana d’erbigliule.

U maestru dumanda à i zitelli di truvà a forma verbale in ogni frasa è a face inturnià.
Dopu, u maestru piglia in contu a prima frasa è face varià u sugettu rimpiazzendulu da « eiu », « Paulu è Maria », « tù », « voi », « noi » ...
S’ottenenu e frase :
→ Eiu aghju dumandatu ...
→ Paulu è Maria anu dumandatu ...
→ Tù ai dumandatu ...
→ Voi avete dumandatu ...
→ Noi avemu dumandatu ...
Si face dì à i zitelli a regula di custruzzione di u passatu cumpostu. Vale à dì : U verbiu avè à u prisente seguitatu da u participiu passatu di u verbiu sceltu.
U maestru dumanda à un zitellu di scrive a cunghjucazione di u verbiu « cantà » à u passatu cumpostu è à un antru quellu di u verbiu « parlà »

E cunghjucazione seranu cupiate nant’à u quaternu.
Terza tappa :
Eserciziu strutturale cullettivu
Prupone à i zitelli di truvà a forma verbale ghjusta.
U maestru dà u verbiu à l’infinitivu è a persona. I zitelli pruponenu a risposta bona chì serà scritta nant’à a tavulella , po curretta à u tavulone.

U maestru prupone :
 Cantà / 3a pers. Plurale
 Ghjucà / 2a pers . Sing.
 Marchjà / 1a pers. Plur.
 Ballà / 1a pers.Plur.
 Cuntà / 3a pers. Sing.
 Guardà / 2a pers. Plur
 Manghjà / 1a pers. Sing
 Saltà / 3a pers. Plur

Travagliu individuale : (Da vede fiscia di u scularu)

Ind’è una seconda seanza serà studiatu u passatu cumpostu cù l’ausiliariu « esse ».