Cappuccinella Rossa hè una zitella chì campa in furesta. Si chjama cusì chì porta sempre in capu un cappuccinu di lana rossa.
Un ghjornu a so mamma li dice :
« Vai ind’è Mammone chì hè malata è portali stu biscottu è stu vasettu di butiru. »
S’arricumanda Mamma à Cappuccinella Rossa : « Sopr’à tuttu, fila a to strada. Ùn pianta è sfidati di u lupu sempre piattu in furesta. ! » Cappuccinella Rossa viaghja in furesta è d’un colpu sente una voce : « Induve vai ? » Si gira è vede un lupu , un lupu maiò, un lupone grisgiu... « Vò à purtà un biscottu è un vasettu di butiru ind’è Mammò in fondu di a furesta », spieca a zitella. « Ci femu una corsa ? » prupone u lupu. « Tù pigli à manca è eiu à diritta ! U primu chì ghjunghje hà vintu a corsa ! » Partenu à tempu a zitella è l’animale ma u lupu chì corre in furia ghjunghje u primu in casa di a Mammone. Cappuccinella Rossa , ella, piglia u so tempu è coglie un bellu mazzulu di fiori per dallu à a so Mammone . U lupu s’avvicina di a casa è pichja à l’usciu. « - Tocchi tocchi !
  Quale hè ? dumanda a vechja ?
  Sò eiu, Cappuccinella Rossa ! risponde u lupu scambiendu a so voce.
  Tira a funicella, a vulella cascherà è a porta s’aprerà, dice Mammone da u lettu. » U lupu apre a porta, si lampa nant’à a vechja è a si manghja sana sana. Sì veste cù una camisgia di notte di a vechja, si ficca in lettu è aspetta à Cappuccinella Rossa chì ghjunghje guasi subitu. « - Tocchi tocchi !
  Quale hè ? dumanda u lupu calendu a voce.
  Sò eiu, Cappuccinella Rossa ! risponde a zitella.
  Tira a funicella, a vulella cascherà è a porta s’aprerà, ripete u lupu chì s’arricorda di e parolle di a Mammone . » Cappuccinella Rossa s’avvicina di u lettu è dice : « - Tamanti ochji chì vo avete !
  Hè per vedeti megliu a mo figliulella ! risponde u lupu - Tamante arechje chì vo avete !
  Hè per senteti megliu a mo figliulella ! - Tamante bracce chì vo avete !
  Hè per abbracciatti megliu a mo figliulella ! - Tamanti denti chì vo avete !
  Hè per manghjatti megliu ! Dicendu ste parolle, u lupacciu si lampa nant’à Cappuccinella Rossa è a si ingolle sana sana. Un cacciadore chì passava cù u so fucile hà vistu tuttu. Entre in casa, tira una fucilata à u lupu è u tomba. Cù a so cultella apre u corpu di l’animale è face sorte a zitella cù a so Mammone . Sò cuntente assai assai è invitanu u cacciadore à manghjà u biscottu cun elle.