Ogettivu :
Cunnosce i cinque sensi è l’urgani chì li currispondenu da metteci in leia cù u mondu in giru à noi.

Materiale :
Tichette cù l’urgani di i sensi : u nasu, l’arechja, l’ochju, a manu (a pelle), a lingua.

Sbucinera :

Prima tappa :
Travagliu cullettivu :
U maestru s’appoghja nantu à u cuntrastu trà Cappuccinella Rossa è u lupu in casa di a mammone per ritruvà e parolle « ochji », « bracce », « arechje ». Prupone una seria di dumande per fà dì à ciò chì ghjovanu l’ochji, à chì ghjovanu l’arechje...
Scrive à u tavulone :
 l’ochji ghjovanu per vede.
 l’arechje ghjovanu per sente.
Face truvà l’altri urgani cù i sensi chì li currispondenu (a vista, u tuccà, l’udì, l’odoratu, u gustu).
U maestru serà attentu à spiecà à i zitelli chì per schisà a cunfusione trà « sente » cù u nasu è « sente » cù l’arechje, s’aduprerà e parolle « l’udì » per u sensu chì l’urganu hè l’arechja è « l’odoratu » per u sensu chì l’urganu hè u nasu.
U maestru dumanda dinù à chì ghjovanu i sensi di modu generale.

Seconda tappa :
travagliu cullettivu
Custruzzione cullettiva di u « teni à mente » da cupià nantu à u quaternu di scuperta di u mondu.
I sensi ci mettenu in leia cù u mondu in giru à noi.
I cinque sensi sò : a vista, u tuccà, l’udì, l’odoratu, u gustu.
 l’ochju hè l’urganu di a vista.
 l’arechja hè l’urganu di l’udì.
 u nasu hè l’urganu di l’odoratu.
 a lingua hè l’urganu di u gustu.
 a pelle hè l’urganu di u tuccà.

Si puderà à un antru mumentu prupone un travagliu più specificu nantu à u gustu (a settimana di u gustu) per definisce i 4 sapori cù u schema di a lingua cù e parte sensibile à l’amaru, à l’acidu, à u salitu è à l’inzuccheratu.

Travagliu individuale : Fisce per u sculare.