Ghjallinetta rossa

C’era una volta quattru amichi : Purchettu, Anatra, Ghjattinu è Ghjallinetta rossa. Ghjallinetta rossa avia trè piulelli. Eccu chì un ghjornu, bizzichittendu, Ghjallinetta rossa scuprì qualchi granelle.

Pigliò è truvò i so trè amichi è li dumandò : « Quale hè chì mi vole aiutà à pone e granelle ?
 Micca eiu ! disse Purchettu.
 Micca eiu ! disse Anatra.
 Micca eiu ! disse Ghjattinu.
 Tandu e puneraghju da pè mè ! disse ghjallinetta rossa. Cusì detta fù fatta.

E si mìssenu e granelle à caccià è diventoni spiche di granu tamante. Dopu, ghjallinetta rossa dumandò à i so trè amichi : « Quale hè chì mi vole aiutà à sigà u granu ?
 Micca eiu ! disse Purchettu.
 Micca eiu ! disse Anatra.
 Micca eiu ! disse Ghjattinu.
 Tandu, u sigaraghju da pè mè stu granu ! » disse ghjallinetta rossa. Cusì detta, fù fatta.

Dopu, ghjallinetta rossa dumandò à i so amichi : « Quale hè chì mi vole aiutà à tribbià u granu ?
 Micca eiu ! disse Purchettu.
 Micca eiu ! disse Anatra.
 Micca eiu ! disse Ghjattinu.
 Tandu, u tribbieraghju da pè me stu granu ! » disse ghjallinetta rossa. Cusì detta, fù fatta.

Dopu, ghjallinetta rossa dumandò à i so amichi : « Quale hè chì mi vole aiutà à macinà u granu pè fane farina ?
 Micca eiu ! disse Purchettu.
 Micca eiu ! disse Anatra.
 Micca eiu ! disse Ghjattinu.
 Tandu, u macineraghju da pè me stu granu ! » disse ghjallinetta rossa. Cusì detta, fù fatta.

Dopu, ghjallinetta rossa dumandò à i so amichi : « Quale hè chì mi vole aiutà à minà u pane ?
 Micca eiu ! disse Purchettu.
 Micca eiu ! disse Anatra.
 Micca eiu ! disse Ghjattinu.
 Tandu, u mineraghju da pè me stu pane ! » disse ghjallinetta rossa. Cusì detta, fù fatta.

Dopu, ghjallinetta rossa chjamò à i so amichi : « Quale hè chì mi vole aiutà à manghjà u pane ?
 Eiu ! disse Purchettu.
 Eiu ! disse Anatra.
 Eiu ! disse Ghjattinu.
 A nò ! disse ghjallinetta rossa, l’avemu da manghjà noi stu pane i mo trè piulelli ed’eiu. » Cusì detta, fù fatta !