Publicatu : 16 janvier 2007

Riscrittura teatrale

Riscrittura teatrale

Ogettivi :
- Mette in scena un racontu cunnisciutu

Materiale
- A versione teatrale di Cappuccinella Rossa
- Mariunette (fatte da i zitelli in Arte plastiche)

Sbucinera :

I zitelli cunnoscenu digià une poche di strutture esciute da u racontu è anu amparatu i cuntrasti. Li si prupone di ghjucà a storia sana di Cappuccinella Rossa. U maestru i porta à rimarcà ch’ella ci hè a necessità di riscrive u racontu cum’è s’ellu fussi un pezzu di teatru. Si ripiglianu e caratteristiche di stu generu di scrittu : i nomi di i persunagi sò seguidati da dui punti per annuncià e parolle dette. Per e parte di narrazione si prupone à i zitelli di creà un antru persunagiu : u narratore. Si principia u travagliu di riscritura dopu avè scumpartutu u racontu in sequenze crunulogiche. Stu travagliu si ferà nant’à parechje seanze, segondu cum’elli avanzanu i zitelli.

Cappuccinella Rossa - Charles Perrault

Adattazione téatrale

U narratore : In tempi d’una volta, ind’una casuccia à l’orlu di a furesta, ci stava una donna cù a so figliola. A zitella si chjamava Cappuccinella Rossa perchè chì a Mamma l’avia fattu un cappuccinu di lana rossa è a zitella, truvendu ch’ellu li stava propiu bè, u purtava sempre. Cusi li ne era firmatu u nome. Al dilà di a furesta campava a Mammone di Cappuccinella Rossa.

A mamma : Aghju intesu di chì Mammatone hè malata ; ci vole chi tù li porti sta micchittuccia è stu vasettu di butiru. A cunnosci a strada ? Iè ? Allora fila a to strada diritta è sè tù trovi à qualchissia, ùn piantà ! Soprattuttu s’ellu hè u lupu ! Ai capitu ? Cappuccinella Rossa : Iè, o Mà, ùn ci hè bisognu à dilla tantu... Filà a mo strada... Ùn parlà cù nisunu... Ùn perde tempu... A vedi chi a sò !

U narratore : A zitelletta partì allegra cù u so spurtellucciu è filò a so strada per andà ind’è a Mammone. Ghjustu s’ella piantava à coglie qualchì fiore per fà un mazzulu per a so Mammone. D’un colpu, Cappuccinella Rossa sentì un rimore. Si girò è chì ti vide ? Un lupu, ma un lupu tamantu chi ùn si pò dì. Un lupone !

U lupu : Salute o Cappuccinè !

U narratore : U lupu, si capisce, cunniscia à Cappuccinella Rossa postu ch’ellu l’avia fidighjata à spessu cù i so cannuchjali pensendu « una zitelletta cusì paccicciotta deve esse un pranzu di principe ! »

Cappuccinella Rossa : Salute o sgiò Lupu, salute !

U lupu : Sì Cappuccinella Rossa è ti scumettu chì tù vai ind’è Mammatone ... A cunnosci a strada ? Aspetta, t’aghju da fa vede un scurtatoghju.

Cappuccinella Rossa : Innò o sgiò Lupu ! U pruverbiu dice chì « strada bella ùn fù mai longa »...

U narratore : Cappuccinella Rossa ripigliò a so strada è u lupu a lasciò andà

U lupu : Ti scumettu ch’aghju da fà più in furia chè tè !

U narratore : U lupu si misse à corre cù un surrisu ingordu nant’à e labre. Ben intesu, ghjunse u primu ind’è a Mammone, bellu nanzu à Cappuccinella Rossa. Ghjuntu davanti à a casarella, pichjò à l’usciu.

A mamonne : Quale hè ?

U lupu : pruvendu à cambià a so voce
Sò eiu, a vostra figliulina, a vostra Cappuccinella Rossa, o Mammò !

A mamonne : Tira a funicella, a vulella cascherà è a porta s’aprerà !

U narratore : Sentendu ste parolle, u lupu s’infrugnò in casa, si fragò à a vechja è a si ingullì sana sana senza mancu mastucalla.
U lupu si liccò u mustacciu pensendu chì a vechja era ghjustu un apperitivu è chì prestu avia da affaccà un pranzu più tenneru... In furia, si sciaccò a scufia di a _ _ Mammone, si vestì cù una di e so camisge di notte, si ficcò in lettu è aspittò.
Ùn aspittò tantu chì Cappuccinella Rossa s’era spicciata è ghjunse anc’ella à pichjà à l’usciu.

U lupu : pruvendu à parlà cume una vechja
Quale hè ?

Cappuccinella Rossa : Sò eiu, a vostra Cappuccinella Rossa.

U lupu : pruvendu à parlà cume una vechja
Tira a funicella, a vulella cascherà è a porta s’aprerà !

U narratore : Cappuccinella Rossa entrò subitu è s’avvicinò à u lettu.

Cappuccinella Rossa : O Mammò, tamanti ochji chì vo avete !

U lupu : Sò per vedeti megliu, a mo figliuluccia !

Cappuccinella Rossa : O Mammò, tamante arechje chì vo avete !

U lupu : Sò per senteti megliu, a mo figliulella !

Cappuccinella Rossa : O Mammò, chì bracce tamante !

U lupu : Sò per megliu abracciatti a mo figliulella !

Cappuccinella Rossa : O Mammò, chì dentoni !

U lupu : Sò per manghjatti megliu, o niscentrò !

U narratore : Cù ste parolle, u lupu si tirò à Cappuccinella Rossa è a si ingullì sana sana.

Cappuccinella Rossa e a mamonne : senza piantà
Aiutu, aiutu !

U narratore : Ancu di grazia chì fora c’era un cacciadore, ch’ellu avia vistu è intesu tuttu ! Entrò subitu cù u so fucile è sciaccò una cartucciata à u lupu. Si sentianu sempre i lagni di a Mammone è di Cappuccinella Rossa, allora u cacciadore cacciò a so cultella di stacca è aprì u corpu di u lupu. Escinu inseme a vechja è a zitella.

A mamonne : A ringrazziavvi o sgiò Cacciadore, femuci un vesperinu cù sta micchetta è stu butiru.

Word - 47 ko
Riscrittura teatrale
PDF - 19.2 ko
Riscrittura teatrale