Publicatu : 15 janvier 2007

Cunghjujcazione

Ricunniscenza di u passatu landanu

Ogettivu :
- Ricunnosce u passatu landanu à a terza persona di u singulare.

Sbucinera : U maestru face leghje u riassuntu di Cappuccinella Rossa custruitu cù i zitelli chì hè scrittu à u tavulone.
Tempi fà, una mamma mandò a so zitelluccia, chjamata Cappuccinella Rossa, à purtà una micchetta è un vasettu di butiru à a so mammone malata chì stava al dilà di a furesta. Strada facendu, scuntrò un lupu chì a si vulia manghjà. L’animale si misse à corre per ghjunghje u primu ind’è a mamonne. Tempu ghjuntu si la manghjò po si vestì cù i so panni è si sciaccò in lettu. Quand’ella affaccò a zitella, fù anch’ella manghjata da u lupu. Per furtuna, un cacciadore, sentendu i lagni , entrì in casa, tumbò u lupu è liberò a mamonne è a so figliulina.

Li si dumanda di sottulineà i verbii cunghjucati è per ogni verbiu di dà u so infinitivu è a persona. Si prova à fà dì qualessi sò i tempi impiecati quì. Si pò omu pensà ch’ellu hè digià statu fattu stu travagliu in francese è si face dunque u paragone trà corsu è francese per rimarcà chì :
A u coppiu di tempi di u racontu in francese (Imparfait/ Passé Simple) currisponde in corsu u coppiu Imperfettu/ Passatu Landanu. I verbii chì dicenu ciò chì accade sò à u passatu landanu è quelli chì discrivenu u quatru di l’azzione sò à l’imperfettu.

A maestra scrive à u tavulone :

Mandò : verbiu Mandà à a 3a persona di u singulare di u passatu landanu
Stava : verbiu Stà à a 3a persona di u singulare di l’imperfettu
Scuntrò : verbiu Scuntrà à à a 3a persona di u singulare di u passatu landanu
Vulia : verbiu Vulè à a 3a persona di u singulare di l’imperfettu
Si misse : verbiu Mettesi à a 3a persona di u singulare di u passatu landanu
Manghjò : verbiu Manghjà à a 3a persona di u singulare di u passatu landanu
Si vestì : verbiu Vestesi à a 3a persona di u singulare di u passatu landanu
Si sciaccò : verbiu Sciaccassi à a 3a persona di u singulare di u passatu landanu
Affaccò : verbiu Affaccò à à a 3a persona di u singulare di u passatu landanu
Fù : verbiu Esse à a 3a persona di u singulare di u passatu landanu
Entrì : verbiu Entre à a 3a persona di u singulare di u passatu landanu
Tumbò : verbiu Tumbà à a 3a persona di u singulare di u passatu landanu
Liberò : verbiu Liberà à a 3a persona di u singulare di u passatu landanu

Si facenu rimarcà à i zitelli e regule di furmazione generale : I verbii à l’infinitivu in « à » sò in « ò » à a 3a persona di u singulare di u passatu landanu è quelli in « e » à l’infinitivu sò in « ì » à a 3a persona di u singulare di u passatu landanu. Ci sò certi verbii chì ùn sò micca regulari. L’ausiliariu « esse » dà una forma chì si pò ritene : « Fù ». L’ausiliariu « Avè », chì ùn ci hè in stu testu, dà « Ebbe ».

Eserciziu individuale : da vede a fiscia di u scularu.

Rimarca : Si pò ripiglià sta dimarchja cù altre frase di u racontu per ricunnosce u passatu landanu à a terza persona di u plurale.

Word - 42 ko
Ricunniscenza di u passatu landanu
PDF - 91.9 ko
Ricunniscenza di u passatu landanu